တရားရုံးဝန်ထမ်းများ ရုံးလုပ်ငန်းဆိုင်ရာ အရည်အသွေးမြှင့်တင်ရေးသင်တန်း အမှတ်စဉ် ၁/၂၀၂၅ ဆင်းပွဲ နှင့် ဆုချီးမြှင့်ခြင်းအခမ်းအနား ကျင်းပ

           တရားရုံးဝန်ထမ်းများ ရုံးလုပ်ငန်းဆိုင်ရာ အရည်အသွေးမြှင့်တင်ရေးသင်တန်း အမှတ်စဉ် ၁/၂၀၂၅ ဆင်းပွဲ နှင့် ဆုချီးမြှင့်ခြင်းအခမ်းအနားကို ၂၀၂၅ ခုနှစ်၊ ဇွန်လ (၁၅)ရက်နေ့၊ (၁၆:၀၀) နာရီအချိန်တွင် ကရင်ပြည်နယ်တရားလွှတ်တော် အစည်းအဝေးခန်းမ၌ ကျင်းပသည်။

 

          အဆိုပါ အခမ်းအနားသို့ ပြည်နယ်တရားလွှတ်တော် တရားသူကြီးချုပ် နှင့် ပြည်နယ် တရားလွှတ်တော်တရားသူကြီးများ၊ ပြည်နယ်တရားရေးဦးစီးမှူးနှင့်ပြည်နယ်တရားလွှတ်တော်မှ ဒုတိယညွှန်ကြားရေးမှူးများ နှင့် လက်ထောက်ညွှန်ကြားရေးမှူးများ၊ ဘားအံ၊ ကော့ကရိတ်၊ ဖာပွန် နှင့် ကြာအင်းဆိပ်ကြီးခရိုင်/ မြို့နယ်တရားရုံးတို့မှ တရားသူကြီးများ စုစုပေါင်း (၂၃) ဦးနှင့် သင်တန်းသား/ သူ (၂၀) ဦးတို့ တက်ရောက်ခဲ့ကြပါသည်။

 

           အခမ်းအနားတွင် ပြည်နယ်တရားလွှတ်တော် တရားသူကြီးချုပ် ဦးညွန့်လင်းက သင်တန်းဆင်း ဂုဏ်ပြုအမှာစကားပြောကြားပြီး ပြည်နယ်တရားရေးဦးစီးမှူး ဒေါ်ခင်ပြုံးရီက သင်တန်းဖွင့်လှစ်ရာတွင် ကြီးကြပ်လမ်းညွှန်ကူညီဆောင်ရွက်ပေးသူများအား ကျေးဇူးတင်စကား ပြောကြားပါသည်။  ဆက်လက်၍ ပြည်နယ်တရားလွှတ်တော် တရားသူကြီးချုပ် ဦးညွန့်လင်း၊ ပြည်နယ်တရားလွှတ်တော်တရားသူကြီး ဒေါ်ခင်စိမ်းဝင်း နှင့် ပြည်နယ်တရားလွှတ်တော် တရားသူကြီး ဒေါ်နွဲ့နွဲ့ဦး၊  ပြည်နယ်တရားရေးဦးစီးမှူး ဒေါ်ခင်ပြုံးရီ တို့က ဆုရရှိသူများနှင့် အောင်လက်မှတ်များအား ချီးမြှင့်ပေးအပ်ခဲ့ပါသည်။

 

            ၇- ၆- ၂၀၂၅၊ ၈- ၆-၂၀၂၅၊ ၁၄- ၆-၂၀၂၅ နှင့် ၁၅- ၆- ၂၀၂၅ စနေ၊ တနင်္ဂနွေ ရုံးပိတ်ရက် များတွင် နံနက် ၈း၀၀ နာရီမှ ညနေ ၅း၀၀ နာရီထိ သင်တန်းဖွင့်လှစ်ခဲ့ပြီး သင်တန်းတွင် ရုံးစာရေးသားနည်း၊ ဝန်ထမ်းကျင့်ဝတ်နှင့် စည်းကမ်း၊ အမှုတွဲများ ထိန်းသိမ်းရေး၊ ငွေစာရင်း ထိန်းသိမ်းရေး၊ ဘဏ္ဍာရေးကျင့်စဉ်၊ ဝန်ထမ်းတစ်ဦးချင်း၏ လုပ်ငန်းတာဝန်များ၊ တရားရုံးများ လက်စွဲပါ စီမံရေးရာ နှင့် ထောက်ပံ့ရေးရာ ဘာသာရပ်တို့ကို သင်ကြားပို့ချပေးခဲ့ပါသည်။